குடியேற்ற விதிகளில் புதிய விலக்குகள்பதிவுசெய்யப்பட்ட இலங்கைத் தமிழர்கள் உட்பட பல பிரிவுகளுக்கு பாதுகாப்பு

மத்திய உள்துறை அமைச்சகத்தின் குடியேற்றம் மற்றும் வெளிநாட்டவர் விலக்கு திருத்த ஆணை நவம்பர் 5 முதல் நடைமுறைக்கு வந்துள்ளது. 2015 ஜனவரி 9 வரை இந்தியாவில் தஞ்சம் பெற்று அரசு அதிகாரியிடம் பதிவுசெய்த இலங்கைத் தமிழர்களுக்கு, குறிப்பிட்ட நிபந்தனைகளின் கீழ் கடவுச்சீட்டு மற்றும் விசா தொடர்பான விலக்கு தொடர்கிறது.

மதத் துன்புறுத்தல் காரணமாக 2024 டிசம்பர் 31-க்குள் இந்தியா வந்த ஆப்கானிஸ்தான், வங்கதேசம் மற்றும் பாகிஸ்தானைச் சேர்ந்த இந்து, சீக்கியர், பௌத்தர், சமணர், பார்சி, கிறிஸ்தவர் பிரிவினருக்கும் சில விலக்குகள் அளிக்கப்பட்டுள்ளன. அவர்கள் தொடர்ந்து தங்க உரிய விசா பெற வேண்டும்.

இந்தியா–நேபாளம்–பூடான் இடையேயான நேரடி பயணங்களில் அடையாள ஆவணம் காட்டும் நடைமுறையும் தெளிவுபடுத்தப்பட்டுள்ளது. வேறு நாட்டுக்குச் செல்ல அல்லது அங்கிருந்து திரும்ப இந்த எல்லைகளைப் பயன்படுத்தினால் செல்லுபடியாகும் கடவுச்சீட்டு தேவைப்படும்.