பயணிகளிடம் கூடுதல் தொகை கேட்கும் ஓலா செயலிக்கு எதிராக உத்தரவுசெயலியை இயக்கும் நிறுவனத்துக்கு ரூ.10 லட்சம் அபராதம்

பதிவின்போது காட்டப்பட்ட கட்டணத்துக்கு மேல் பணம் செலுத்தினால் வாகனம் விரைவாகக் கிடைக்க வாய்ப்புள்ளதாக ஓலா செயலி தெரிவித்தது. இந்தச் செய்தி பயணிகளைத் தவறாக வழிநடத்தியதாக மத்திய நுகர்வோர் பாதுகாப்பு ஆணையம் தனது நவம்பர் 10 உத்தரவில் கூறியுள்ளது.

பயணம் முடிவதற்கு முன் கூடுதல் பணம் செலுத்தத் தூண்டும் அறிவிப்புகளையும் முன்கூட்டியே நிர்ணயிக்கப்பட்ட தொகைகளையும் உடனடியாக அகற்ற ஆணையம் உத்தரவிட்டது. ஓலாவை இயக்கும் ஏஎன்ஐ டெக்னாலஜீஸ் நிறுவனம் உத்தரவைப் பெற்ற 15 நாட்களுக்குள் அபராதத்தைச் செலுத்தி, எடுத்த நடவடிக்கைகள் குறித்த அறிக்கையை அளிக்க வேண்டும்.