தூத்துக்குடி–வியட்நாம் புதிய சரக்குக் கப்பல் இணைப்பு‘ஹையன் ஆல்பா’ முதல் வருகை; இரு வாரத்திற்கு ஒருமுறை சேவை

வியட்நாம் கொடியுடன் இயங்கும் 1,781 கொள்கலன் திறன் கொண்ட ‘ஹையன் ஆல்பா’ கப்பல் நவம்பர் 7 அன்று தூத்துக்குடி வ.உ.சிதம்பரனார் துறைமுகத்தின் தக்ஷிண பாரத் கேட்வே முனையத்தை முதன்முறையாக வந்தடைந்தது.

தூத்துக்குடி–சென்னை–ஹோ சி மின் நகரம்–ஹைபாங்–சின்சோ–போர்ட் கிளாங் வழித்தடத்தில் சேவை இரு வாரத்திற்கு ஒருமுறை இயங்கும். தூத்துக்குடியில் இருந்து ஹோ சி மின் நகரத்துக்கு சுமார் 7 நாளும், ஹைபாங் துறைமுகத்துக்கு 10 நாளும் பயண நேரம் என துறைமுகத் தகவல் கூறுகிறது.

முதல் வருகையில் இறக்குமதி மற்றும் மாற்றுக் கப்பல் சரக்கு சேர்த்து 823 டிஇயு கொள்கலன்கள் கையாளப்பட்டன. இந்த இணைப்பு தென் தமிழக ஏற்றுமதி, இறக்குமதி நிறுவனங்களுக்கு கூடுதல் கடல்வழியை வழங்கும் என துறைமுக ஆணையம் தெரிவித்துள்ளது.